Алматы: Соода борборундагы концертте Кайрат Нуртас ырдабай кетип калып, массалык баш аламандык чыкты

31-август күнү Казакстандын Алматы шаарындагы "Прайм-Плаза" соода борборунда "Караокенин мыкты аткаруучусу" аттуу сынактын финалчыларынын концерти токтотулуп, массалык баш аламандык чыкты. Тополоң белгилүү ырчы Кайрат Нуртастын сахнага чыгуусунан кийин башталды. Ырчы бир ырды ырдап бүткүчө сахнаны курчаган тосмолор бузулуп, айрым көрүүчүлөр сахнага чейин чыга баштайт. Мындан улам ырчы коопсуздук кызматкерлеринин коштоосунда ал жерден кетип калды. Бул көрүүчүлөрдүн кыжырын келтирип, мушташ башталды. Жаштар алгач сахнага, андан кийин бири-бирин таш, желим бөтөлкөлөр менен урууга өтүшүп массалык жаңжал уланып кетти.   

Полициянын маалыматы боюнча, окуя болгон жерге кошумча тартип сакчылары жана ички аскерлер келди. 3 адам оор жаракат алып, 7 полиция кызматкери ооруканага кайрылды. Учурда абал туруктуу, кылмышка шектүүлөрдүн 165и кармалып, тергөө башталыптыр. Окуяга күнөөлүүлөр 5-7 жылга чейин эркинен ажыратылмакчы. Тополоңчулар участкалык полиция кызматкеринин автоунаасын, жайкы кафелердин бирин өрттөштү. 11 кызматтык, 1 жеке жана 2 өрт өчүрүүчү унаа талкаланганы белгилүү болду. Концертке 5 миңдей адам келгени белгилүү болду. 

Казакстандык шоумен Данияр Батырбаев окуя боюнча өзүнүн интернет баракчасына буларды жазды. "Кайрат бир ырын ырдагандан кийин түшүнбөстүк болуп кетти. Күйөрмандар сахна жасалгаларын бузуп, ырчы шарт бурулуп сахнадан кетип калды. Мындан кийин баш аламандык башталды".  

Полициянын билдиришинче, соода борбордун аймагына бул концертти уюштурууга шаар жетекчилиги тарабынан уруксат берилген эмес жана уюштуруучулар жоопко тартылат. Кылмыш иши козголуп, тергөө жүрүп жатыптыр. Уюштурууларга айып салынышы же 5 жылга чейин эркинен ажыратылышы, белгилүү бир убакытка же биротоло белгилүү бир кызматта иштөө укугунан ажыратыла турганы айтылууда.  

29-августта уюштуруучуларга концертти көп адамга ылайыкталбаган жерде өткөрүүгө болбой тургандыгы тууралуу эскертүү берилип, концертти токтотуу сунушу айтылган. Бирок соода борборунун жетекчилиги коомдук тартипти өздөрү көзөмөлгө ала тургандыктарын айтышып болбой коюшуптур.