“Супер-Инфо” гезити мыкты дизайнеринен ажырады

“Супер-Инфо” гезитинин дизайнери Азамат Сагынбаев 6-майда узакка созулган оорудан улам мезгилсиз дүйнө салды. Кесиптешибиз соӊку жарым жылдан бери ден соолугуна байланыштуу дарыланып жаткан.

Азамат Сагынбаев 1981-жылы, 16-июлда төрөлгөн. Бул жылы 39 жашка чыкмак. Ал “Супер-Инфо” гезити түптөлгөндөн бери дизайнерлик кесипти аркалап келе жаткан, өз иши менен далайларды суктанткан, гезитке башкалардан өзгөчө көрк берип, ошонусу менен “Супер-Инфонун” өлкөдөгү эң көп нускалуу гезит болушуна опол тоодой салым кошкон жигит эле. Азаматтын жетегинде иштеген дизайнерлер тобунун эмгегинин арты менен “Супер-Инфо” бир нече ирет мыкты жасалгаланган гезит катары сыйлыктарга ээ болгон. Ал өз ишин сүйгөн, таланттуу, жоопкерчиликтүү, адамгерчилиги бийик инсан эле. Артында апасы, жакындары, жубайы жана 3 баласы калды.

Кейиштүүсү, 1-май күнү 2 уулдан соң кыздуу болгонун билбей кетти. Кесиптешибиздин бир туугандарына, үй-бүлөсүнө тереӊ кайгыруу менен көӊүл айтабыз.

Азамат, сенин элесиӊ биздин жүрөгүбүздө түбөлүк жашайт!

“Супер-Инфо” гезитинин,

SUPER.KG порталынын жана

SUPER.TV`нын эмгек жамааты