ИИМ: "Мурдагы прокурор Сыймык Жапыкеевдин билдирүүлөрү жана чакырыктары боюнча иш козголду"

Мурдагы прокурор Сыймык Жапыкеевдин билдирүүлөрү жана чакырыктары боюнча сотко чейинки өндүрүш башталды. Бул тууралуу ИИМдин басма сөз кызматынан билдиришти.

Ички иштер министрлигине Жогорку Кеңештин депутаты Кубанычбек Жумалиев кайрылып, социалдык түйүндөрдө Сыймык Жапыкеев деген жаранга мыйзам чегинде чара көрүү тууралуу кайрылган. Анда Жапыкеев Жумалиевге карата жалган маалыматтарды таратып, анын үй-бүлөсүнүн миллиондогон байлыктары мыйзамдарды бузуу менен топтолгонун, байлыгы менен мүлкүн тартып алууга жасаган чакырыктары менен анын ден соолугуна жана үй-бүлөсүнүн коопсуздугуна коркунуч туудуруп жаткандыгын көрсөткөн.

"Аталган арыз 7-май күнү ИИМдин Кылмыштарды жана жоруктарды каттоонун бирдиктүү реестрине "жарандарга зомбулук көрсөтүүгө чакырыктар" беренеси менен катталып, сотко чейинки өндүрүш башталган. Сотко чейинки өндүрүштүн жүрүшүндө Сыймык Жапыкеевдин социалдык тармактардагы маалыматтары, видео кайрылуулары толугу менен иликтенип чыкты. Иликтөөлөр көрсөткөндөй, Жапыкеев Жумалиевди ири коррупционер экендигин, ал көптөгөн жылдар бою мамлекеттик кызматта иштеп жүрүп, миллиондогон долларды чапчыган мамлекеттик байлыктарды менчиктеп же уурдап алгандыгын айткан. Ошол эле убакта элге чакырык таштап, Жумалиевдин үйүнө барууну жана мыйзамсыз тапкан байлыктарын кайтарып алып, өлкөнүн Кытай мамлекетинин алдындагы карызды төлөп коёлу деген чакырык таштаган. Тергөөнүн жүрүшүндө Жапыкеевдин акыркы убактагы бардык сүйлөгөн сөздөрүнө лингвистикалык экспертизалар дайындалды. Учурда ыкчам тергөө иш-чаралары жүргүзүлүүдө", - деп жазылат билдирүүдө.