Шашылыш билдирүү! Өлкөдө 5 күн бою туруксуз аба ырайы күтүлөт, айрым жерлерде мөндүр жаашы мүмкүн

Бүгүн, 5-июндан баштап 10-июнга чейин өлкө аймагында туруксуз аба ырайы күтүлөт. Мындай маалыматты Кыргызгидрометтен билдиришти.

Ага ылайык, өлкөдө мезгил-мезгили менен жаан жаап, күн күркүрөшү, бийик тоолуу райондордо кар жаашы күтүлүүдө.

5-июнда күндүз, 6-7-июндарда Чүй, Ысык-Көл, Нарын облустарынын кээ бир райондорунда, Ош, Жалал-Абад, Баткен облустарынын тоо этектеринде жана тоолуу райондорунда, 8-9-июндарда республиканын кээ бир аймактарында катуу жаан-чачын болушу мүмкүн. 5-6-июндарда айрым жерлерде мөндүр жаашынын ыктымалы бар. Абанын температурасы төмөндөйт.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.

Тоолуу аймактарда жана тоо этектериндеги райондорунда сел жүрүшү мүмкүн.