Дин аалымы Чубак Жалиловдун дүйнөдөн кайтканына байланыштуу бийлик өкүлдөрү жакындарына көңүл айтышты

Экс-муфтий, белгилүү дин аалымы Чубак Жалиловдун мезгилсиз дүйнөдөн кайтканына байланыштуу өлкө башчысы Сооронбай Жээнбеков, өкмөт башчы Кубатбек Боронов, Жогорку Кеңештин төрагасы Дастанбек Жумабеков баш болгон бийлик өкүлдөрүнүн жана коомдук ишмерлердин атынан көңүл айтуу каты жарыяланды.

Көңүл айтууда Чубак Жалиловдун жаштарды адеп-ахлакка, ыймандуулукка тарбиялоого, улуттар аралык ынтымакты, конфессиялык аралык байланыштарды бекемдөөгө өзгөчө салым кошкону белгиленет.

"Чубак Жалилов убагында муфтий катары Мусулмандар дин башкармалыгынын иштерин жакшыртууга болгон аракеттерди көргөн, башка өлкөлөрдүн дин башкармалыктары менен байланыштарды бекемдеген.

Ал заманбап коммуникация каражаттарын колдонуу менен мусулман жамаатына сухбаттары менен таанымал болуп, жаштарды адеп-ахлакка, ыймандуулукка тарбиялоого, улуттар аралык ынтымакты, конфессиялык аралык байланыштарды бекемдөөгө өзгөчө салым кошкон.

Орус, араб тилдеринде эркин сүйлөп, эл сүйүп окуган бир нече китептердин автору болгон.

Чубак Жалилов салттык Ханафий мазхабын Кыргыз өлкөсүндө гана эмес, жалпы Борбордук Азия мамлекеттеринин диний турмушунда бекем орун алышына чоң эмгек өтөгөн.

Элди руханий, диний, адеп-ахлак жактан тарбиялоодо зор эмгеги бар. Ислам дининин көрүнүктүү өкүлү катары өлкөбүздүн мусулмандарынын сүймөнчүлүгүнө ээ болгон. Чубак Жалиловдун жаркын элеси жалпы элибиздин эсинде дайыма сакталат. Маркумдун үй-бүлөсүнө жана жакындарына терең кайгыруу менен көңүл айтып, аза кайгысын тең бөлүшөбүз" - деп жазылат көңүл айтуу катында.