Иттин шорпосунан коронавируска даба издегендерге дарыгер кеңеш берди

Акыркы күндөрү коронавирус илдети өлкөдө жайылып жаткан сайын адамдар да дабаны ар кандай азыктардан издей баштады көрүнөт. Дегенибиз, айрымдары өпкө оорусун айыктырат деген ишенимде иттин этин жеп, шорпосун ичсе, кээ бири иммунитетти түшүрбөйт деп суур этин жеп жатканын айтышууда.

Ал эми кээ бир шаар тургундары Бишкекте жолбун иттердин азайып кеткенин айтышса, айрым интернет колдонуучулары иттин өлүктөрү көчөдө жатканын социалдык тармактарга жазып чыгышкан.

“Адамдар, эсиңерге келгиле, иттин майы пневмонияга жардам бербейт. Китеп ачып окуп көргүлө, силер бей күнөө жолбун жаныбарды өлтүрүп жатасыңар, алар ансыз деле оорулуу, алардан эхинококк сыяктуу жугуштуу илдеттен башка эч нерсе таппайсыңар. Биз 21-кылымда жашап жатабыз, дарыгерлерге кайрылгыла”, - деп жазган автору белгисиз жаран социалдык тармактагы баракчасына.

Ал эми коронавирусту дарылоонун мындай ыкмасын дарыгерлер сунуштабайт. “Негизи бул тууралуу биз көп эле айтып жүрөбүз. Ачыгын айтканда жардам бербейт. Кандай болгон күндө дагы дарыгерге кайрылуу керек. Мындай нерселерди мен сунуш кылбайт элем”, - деп билдирди Бишкек шаардык №1 оорукананын пульмонолог дарыгери Замира Отонбаева.