Даамы адамды азгырган Оштун түрдүү самсалары (видеорепортаж)

Ош - улуттук тамактардын борбору. Айрыкча Ошту буркураган даамдуу самсасыз элестетүү мүмкүн эмес.

Эли эмгекчил, меймандос деп сыпатталган Ош шаарында кыймыл эрте башталат экен. Жыты аңкып, адамдын табитин ачып турган ашканалар шаарда саат 7де кадимки кардарларды кабыл алып, иштей баштайт. Ал эми кызматкерлер канчада иштеп башташат деп кызыгып жатсаңыз, самса жасаган жумушчу таң ата электе, тагыраагы, таңкы саат 5те ишин баштайт.

Даамдуу тамактардын мекени аталган Оштон чыныгы самсы жасаган жайды табуу да оңой болгон жок. Сураштырып отуруп шаардын так ортосунда жайгашкан самсаканалардын бирине баш бактык. Анда самса жаап иштеген Таир Абдихов болгону 23 жашта. Ал 15 жашынан бул жумушка аралашкан. Каарманыбыз жалаң эт кошулуп жасалган уйгур самсасы кантип жасаларын жумуш үстүндө көрсөтүп берди.

Уйгур самсасынын бир самсага ылайыкташкан камырынын ар бири 30 граммдан болот. Самса жасаган чебердин айтымында, самсанын жакшы болушу жасалган камырга байланыштуу. Камыр катураак болуш керек жана аны жайып жатканда четин жука, ортосун калың кылып жайуу талапка ылайык. Бул аракеттер самсага салынган фарштын майы ортого топтолуп, арты да катуу болбой, даамдуу болуп бышуусуна өбөлгө болот.

Самса жасап иштегенине 8 жылдан ашкан каарманыбызга көз ченем менен кол ченемден өткөн тараза жок. Ал таразасыз эле ар бир самсага керектелүүчү фаршты ыкчам салып жатты.

Биз самсаны тандырга жабыштырдык, кызыгы ал 4 мүнөттө бышып, тандырдан үзүүгө даяр болду.

Андан аркы кадамыбыз шаардагы чоң самса жасаган самсакананы карай уланды. Самсанын бул түрүн Улукбек Мамыржанов жабат.

Ал жасаган тандыр самсанын фаршына майда тууралган пияз, ири тууралган эт, зире, кашнич, чоң тууралган куйрук май жана туз кошулду. Ал эми камырына болсо, суу май, жумуртка жана туз кошулуп катуу жуурулду.

Бул чоң самса кичине жана чоң деп эки түргө бөлүнөт. Чоңунун баасы 150 сом болсо, кичинеси 80 сом. Тандыр самсанын даамы жагылган отко да байланыштуу. Каарманыбыз отко кадимки пахтанын сөңгөгүн жакса, самсанын даамы башкача болот дейт.