Кыргыз өлкөсү менен Венгриянын ортосунда эки тараптуу илимий изилдөөлөр жүргүзүлөт

Кыргыз өлкөсү менен Венгриянын ортосунда эки тараптуу илимий изилдөөлөр жүргүзүлөт. Бул тууралуу Билим берүү жана илим министрлигинин маалымат кызматынан кабарлашты.

Белгилүү болгондой, президент Сооронбай Жээнбековдун 28-29-сентябрь күндөрү Венгрияга болгон расмий иш сапарынын алкагында эки өлкөнүн ортосунда түзүлгөн макулдашууга ылайык, жакынкы жылдары генетика, тарых, археология, искусство, маданият жаатында эки тараптуу илимий изилдөөлөр жүргүзүлөт.

Мындан сырткары эки тараптуу кызматташуунун шарттарына ылайык, Кыргыз өлкөсүндө венгер таануу институтун ачуу пландалып жатат. Ал эми Венгрияда залкар жазуучу Чыңгыз Айтматовдун аты ыйгарылган сейил бакка анын айкели орнотулат. Венгрия өлкөсүндө улуу инсандын аты кеңири белгилүү жана “Ак кеме”, “Гүлсарат”, “Биринчи мугалим”, “Жамийла” повесттери, “Кыямат”, “Тоолор кулаганда” романдары эң көп окулган адабий чыгармалардын катарына кирет.

Билим берүү жана илим министри Каныбек Исаков жана Венгриянын тышкы иштер министри Петер Сийярто билим берүү жаатында эки тараптуу келишимге кол коюшкан.