Оштун мэри Сарыбашов кызматтан алынды

Ош шаарынын мэри Таалайбек Сарыбашов кызматтан кетти. Мындай чечим бүгүн, 6-октябрда шаардык кеңештин чукул жыйынында бир добуштан кабыл алынды. Маалыматты SUPER.KG порталына мэриянын маалымат катчысы Азамат Абсатаров билдирди.

"45 депутаттын 31и мэрге ишенбөөчүлүк көрсөттү. Бирок Сарыбашов бул чечимге башын жерге салып калбай, дагы да болсо калаа үчүн кызмат кыла берет", - деди ал.

Жыйынга катышкан 31 депутат мэрдин иштөөсүнө каршы экенин билдирип, ишеним көрсөткөн жок.

Ош шаарынын борбордук аянтында митинг уланып жатат. Буга чейин шаар мэри Таалайбек Сарыбашов аянтка чыккан. Ал жалпы чогулгандарды ынтымакка чакырган болчу. Бирок парламенттик шайлоонун жыйынтыгы боюнча эч нерсе айткан эмес.

Ал эми эл мэр кызматын тапшырып берүүсүн талап кылышкан.

Мунун алдында Ош шаардык кеңеши чукул жыйынга чогулуп, мэрдин кызмат ордун карап жатышкан болчу.

5-октябрда парламенттик шайлоонун жыйынтыгына нааразы болгон партиялардын тарапкерлеринин мөөнөтсүз митинги массалык баш аламандык менен коштолду.

6-октябрда митингчилер парламент менен президент отурган имаратты, УКМКнын имаратын басып алышты. "Ала-Тоо" аянтында оппозициячыл партиялардын митинги уланууда.