Жактоочу: "Сокулукта катуу сабалган 6 жаштагы баланын апасы күйөөсүнө карата тосмо арыз жазды"

Буга чейин социалдык тармактарда 6 жаштагы баланын сабалган сүрөтү тарап, токмоктогон кишиге карата чара көрүлбөй жатканы айтылган. Ал эми бул иш боюнча бүгүн 23-ноябрда Чүй ОИИББинин маалымат кызматы окуя Сокулукта болгонун, аталган факты боюнча сотко чейинки өндүрүш иши ачылганын билдирди.

Кийин өзүн баланын апасынын таанышымын деген Индира аттуу интернет колдонуучусу баланы анын өгөй атасы сабаганын, алар "102" кызматына чалып жардам сурап, 5 сааттай күтүп бирок келбегенин, эртеси №3 ооруканага баланын көздөрү шишип, бир көзү кансырап, мээси чайкалган абалда жаткырылганын жазып чыккан.

Ошол эле учурда Индира айымга байланышканыбызда, анын таанышы жолдошун кечиргенин билдирип, окуянын чоо-жайын айтуудан баш тартты.

Бул окуя боюнча жабырлануучу тараптын жактоочусу Шердор Абдыкапаровго байланышканыбызда баланын апасы тосмо арыз жазып бергенин билдирди.

"Бала 21-ноябрда ооруканадан чыгарылган. Себеби, баланын апасы боюнан түшүп калуу коркунучу менен ооруканага түшкөндөн кийин баланы карай турган киши жоктугуна байланыштуу таенеси чыгарып кеткен. Учурда бала Нарын облусуна караштуу Ат-Башы районунда. Биз азыр эле кабар алдык. Баланын абалы жакшы.

Ал эми баланын апасы тосмо арызын жазып берди. Мен дагы сүйлөштүм, жазасын алуу керектигин түшүндүрүп, бирок биз алардын оюна каршы чыга албайбыз.

Негизинен бул окуяга 1 апта болуп баратат. Резенанстуу иш болуп кеткен үчүн бул иш өтө кылдат каралат. Күбөлөр дагы үстүнө чыгып алып сабаган деп айтып жатышат да", - деп билдирди жактоочу Шердор Абдыкапаров.