Теледебат: Мадумаров КТРКнын алып баруучусуна: "Аба ырайы тууралуу суроону ким бер деп жатат?"

Кечээ, 6-январда КТРКда президенттикке талапкерлердин дебаты өттү. Ага Адахан Мадумаров, Канатбек Исаев, Курсан Асанов, Эльдар Абакиров жана Аймен Касенов катышты. Мөөнөтүнөн мурда өтүүчү президенттик шайлоо 2021-жылдын 10-январына дайындалган. Учурда үгүт иштери жүрүп жатат.

Анда алып баруучу "Синоптиктердин маалыматына таяна турган болсок, 10-январда аба ырайы жакшырып, күн 10 градуска чейин жылыйт. Практика көрсөткөндөй аба ырайынын мындай жакшы болушу шайлоочулардын шайлоого активдүү катышуусун шарттайт. Сиз шайлоодон ким жеңет деп ойлойсуз? Шайлоонун жыйынтыгы, элдин тандоосу менен макул болосузбу же тарапташтарыңызды аянтка алып чыгасызбы?" деген суроо берди.

Мадумаров: "Сизге аба ырайы тууралуу суроо бер деп ким айтып жатат?" - деди.

"Алып баруучу катары суроону мен берип жатам. Мүмкүн болсо суроого жооп берсеңиз", - деди алып баруучу.

Мадумаров: "Кудай кааласа, касиеттүү элибиз бар. Алар өз чечимин кабыл алат. Ар бир эл өзү чечет. Мен өмүр бою эл менен жүргөм", - деди.

Алып баруучу талапкерден "Шайлоодон ким жеңет?" деп кайталап сурады.

Мадумаров: "Шайлоодон мен жеңем. Бул жерде турган бардык команда жеңет", - деп жооп берди.