Кыргыз өлкөсүндө өткөн жыл ичинде 9 миңден ашуун үй-бүлө ажырашты (статистика)

2020-жыл ичинде Кыргыз өлкөсүндө 39 миң 944 түгөй баш кошкон. Бул тууралуу Мамлекеттик каттоо кызматынын басма сөз кызматынан билдиришти.

Маалыматка ылайык, 2019-жылы 49 миң 395 түгөй катталган.

"2020-жылы 9 миң 150 түгөй ажырашкан. 2019-жылдын ушул эле мезгилинде 10 миң 995 ажырашуу катталган. Ошентип 2019-жылы 2020-жылга караганда нике жана ажырашуу каттоосу көбүрөөк катталды", - деп жазылат маалыматта.

Аталган кызматтын маалыматы боюнча, бүгүнкү күндө нике жана ажырашууну каттоонун жол-жобосу жөнөкөйлөтүлдү.

"Эми жубайлардын бири ажырашуу жөнүндө арыз жазса, экинчиси кийинчерээк кайрылса, анда ал маалымат ажырашуу жөнүндө актынын биринчи кайрылуунун каттоосуна киргизилет. Мындан тышкары, жубайдын бирөөсү сот тарабынан дайынсыз жоголуп, аракетке жөндөмсүз деп табылып же кылмыш жасагандыгы үчүн үч жылдан ашык мөөнөткө соттолгон учурда, анын жубайынын талабы боюнча ажырашууну мамлекеттик каттоо жол-жобосун жөнгө салган эреже киргизилген", - деп билдиришти Мамлекеттик каттоо кызматынан.