"Айып пул төлөп мамлекетке пайда келтирип жатабыз". Эмил Токтошев жол эрежесин бузган видеосу боюнча үн катты

Интернет желесине вайнер, актёр Эмил Токтошевдин жол эрежесин бузгандагы видеосу тарады. Анда айдоочу каршы тилкеге чыкканын көрүүгө болот.

Талкууга алынып жаткан видео боюнча Эмил Токтошевге байланышканыбызда ырасында эле жол эрежесин бузгандыгын, буга эмне себеп болгонун порталыбызга түшүндүрүп берди.

"Жол эрежесин бузганымды моюнга алам. Окуя кечээ, 5-августта болду. Айып пул жазылды, бүгүн 2700 сом төлөп келдим. Мыйзамга баш ием.

Мен жол эрежесин атайын бузган жокмун, жүк ташуучу унаа кысып баштаганда унаам чийилип, урунуп калбасын деп качуу аракетин жасадым. Кайра өзүмдүн тилкеме түшүүгө болбой калды. Ошондо видеого тартып баштады. Жанымдагы инилерим видеого тартып жаткандарга нааразы болуп сөгүнгөн сөздөрдү айтышкан, аны мен айткандай болуп калыптыр. Унаамда видеокаттоо жок болгондуктан, өзүмдүн туура кылганымды далилдей албай калдым. Аз да болсо айып пул төлөп мамлекетке пайда келтирип жатабыз (күлүп).

Бул окуянын чоо-жайын билбей туруп видеого тартып, жайылтышты. Бирөөнүн абийирин ачкандарга кайрыларым, баарыбыз жолдо жүрүүчүлөрдөнбүз. Маңдайыбызга ар кандай деп жазылган, этият болгула, эртеңки күнү силер дагы ар кандай окуяларга кабылышыңар мүмкүн. Активист болгула, бирок окуянын чын-бышыгын билип алуу керек. Кудай сактасын, эч кимге жамандык каалабайм", - деди ал.