Садыр Жапаровдун карындашы Лазат Нуркожоева туулган күнүнө орусиялык ырчыларды чакырганбы? Нуркожоевадан жооп

Өлкө башчы Садыр Жапаровдун карындашы, "Кыргызстан сулуусу-2020" аталган Лазат Нуркожоева шаардагы тойканалардын биринде 21 жаш туулган күнүн белгилегендиги кабарланган.

Лазат Нуркожоева туулган күнүндө өзүнүн инстаграм баракчасындагы "Stories" бөлүмүнө белгилүү орусиялык ырчылар менен түшкөн сүрөтүн жүктөгөндөн кийин талкууга алынган. Нуркожоева туулган күнүнө ал ырчыларды чакырбаганын SUPER.KG порталына билдирди.

"Мен мынчалык катуу талкуу болот деп ойлогон эмесмин. Анткени туулган күн - бул бир жылда бир келүүчү өздүк майрам. Ошондуктан ар бир адам жакындарынын курчоосунда тосконго толук укугу бар. Мен деле жаман оюм жок, жанымда жүргөн курбуларым, досторум, бирге машыккан таэквондисттер, бир жыл бою чогуу жүргөн устаттарым жана окуучуларым менен өткөрдүм. Коноктордун катарында мен сыйлаган, жакшы көргөн эжелерим Айзада Жамгырчиева, Назира Бердигулова, жеке машыктыруучум Нуриса Мамбеталиева, дайыма мени сулуулаган Айпери Суранчиевалар чакырылган.

Биринчиден, баса белгилеп айткым келгени бизди кичинекейибизден эле ысырап кылбоого үйрөтүшкөн. Ал эми конокторумдун көбү мен курактуу болгондуктан биз эч кандай мал союп, эт тарткан жокпуз. Жадакалса борсоок, таттуу, мөмө-жемиш, түркүн салаттар да болгон жок. Биринчи, экинчи тамагы менен эле узап кетишти.

Ал эми Орусиядан ырчыларды чакырыптыр деген сөздөр карандай калп, жалган сөз. Мен эч кандай чет мамлекеттен ырчыларды чакырган жокмун жана мен өткөргөн кечеге дагы чет мамлекеттердин жарандары катышкан жок. Баарыңыздар билгендей эле, 10-октябрь күнү борбор калаабызда биринчи жолу чоң, масштабдуу фестиваль өтмөк. Ошол фестивалга катышкан ырчылар мен туулган күн өткөргөн мейманканага жайгашыптыр. Ошолордун apасында талкууга алынган Мияги жана Эндшпиль аттуу ырчылары да болгон. Мен конокторумду тоскону фойеге түшсөм, бардык артисттер чогулуп эл менен сүрөткө түшүп жатыптыр. Мен деле эл катары эле сүрөткө түшүп, инстаграмга киргизип койсом ушундай туура эмес маалымат тарап кетиптир. Ал жерде жалгыз эле мен эмес, аларды тааныган бардык жаштар сүрөткө түшкөн", - деп жазды Нуркожоева.