Төрага Шакиев кыргыз армиясы күчтүү 100 мамлекеттин катарына киргенин айтты

Кыргыз армиясы аскердик кубаттуулугу жагынан 100 күчтүү мамлекеттин катарына кирди. Бул тууралуу бүгүн, 22-февралдагы Жогорку Кеңештин жыйынында төрага Нурланбек Шакиев мекенди коргоочуларды майрамы менен куттуктап жатып билдирди.

Анын айтымында акыркы жылдары коопсуздук тармагына өзгөчө көңүл бурулуп, мамлекеттин бүтүндүгүн камсыздоого багытталган чаралар күчөтүлгөн.

"Тагыраагы, жаңы аскердик техникалар, учкучсуз "Байрактар", "Аксүнгүр", "Акынжы" аппараттары, зооттолгон автоунаалар, абадан коргонуучу ракеталар, тик учактар, курал-жарак сатып алынды.

Чек аралар бекемделип, чек арачылардын айлыгы 17 миң сомдон 80 миң сомго чейин көтөрүлдү. Натыйжада Кыргызстандын куралдуу күчтөрүнүн рейтинги 7 позицияга алдыга жылып, күчтүү 100 мамлекеттин катарына кирди.

Бул, албетте, чек эмес, мекенди коргоого багытталган бардык реформаларды колдоп, Жогорку Кеңеште керектүү мыйзамдарды кабыл алууну улантабыз. Мекенибиз бир, аны коргоо ар бирибиздин милдетибиз. Башкысы, элибизде ынтымак, жергебизде тынчтык болсун!", - деди Шакиев.