Баткенде мыйзамсыз курулган 30 объект буздурулду

Баткендин Кызыл-Кыя шаары жана Үч-Коргон айыл өкмөтүндө мыйзамсыз курулган 30 объект буздурулду. Бул тууралуу бүгүн, 22-февралда Суу ресурстары, айыл чарба жана кайра иштетүү өнөр жай министрлигинен билдиришти.

Маалыматка ылайык, Баткен аймактар аралык бөлүмү тарабынан мыйзамсыз курулуштарга текшерүү жүргүзүлгөн. Жыйынтыгында Кызыл-Кыя шаарында 3, Үч-Коргон айыл аймагында 27 мыйзамсыз курулган объект аныкталып, андан тышкары 53 объектиге эскертүү берилген.

"Аталган фактылар боюнча жалпы 18 материал Кадамжай РИИБине өткөрүлүп берилди. Мыйзамсыз курулган курулуштардын ичинен жалпы 30 объект буздурулуп, учурда кайра калыбына келтирилди", - деп айтылат маалыматта.

Ошондой эле министрлик январь айында өлкө боюнча 31 текшерүү жүрүп, мыйзамсыз курулган жайларга жалпы 486 миң сом айып салынганын билдирди.