ТИМ башчысы Кулубаев түркиялык кесиптешине көңүл айтты

Тышкы иштер министри Жээнбек Кулубаев Түркиянын Стамбул шаарындагы 29 адамдын өмүрүн алган имараттагы өрт кырсыгына байланыштуу кесиптеши Хакану Фиданга көңүл айтуу телеграммасын жолдоду. Бул тууралуу министрлик бүгүн, 3-апрелде кабарлады.

«2024-жылдын 2-апрелинде Түркия Республикасынын Стамбул шаарындагы имараттардын биринде болгон өрттүн кесепетинен улам адамдардын курмандыктарына байланыштуу чын дилимден жана терең кайгыруу менен көңүл айтам.

Курман болгондордун үй-бүлөлөрүнө, жакындарына терең кайгыруу менен көңүл айтып жана жабыр тарткандардын тез сакайып кетишин каалайм.

Биз орду толгус жоготуунун азабын жана ачуусун тең бөлүшөбүз», – деп айтылат министрдин телеграммасында.

Эске салсак, чет элдик басылмалар Стамбулдун борборундагы "Masquerade" түнкү клубунда чыккан өрттөң кеминде 29 адам каза болуп, бирөө жарадар болгонун жазышкан.