Транспорт министрлиги акы алына турчу жолдорду атады

Бүгүн, 16-апрелдеги Жогорку Кеңештин Транспорт, коммуникациялар, архитектура жана курулуш комитетинин жыйынында депутат Бактыбек Сыдыков салыктын ордуна акы төлөнө турчу жолдорду салууну сунуштады.

Буга транспорт жана коммуникация министринин орун басары Ырысбек Бариев Өзгөндөгү салынып жаткан айланма жол бүтсө акы төлөнө турчу жол болорун айтып жооп берди.

"Ишкерлер өздөрүнүн акчасына куруп жатышат. Бул жол бүткөндөн кийин акы төлөнүүчү жол болот. Мындан сырткары бизде долбоорлор бар. Азыркы мезгилде биз инвесторлор менен иштешип жатабыз. Сокулук - Белогорка (Бишкек - ​​Жалал-Абад каттамынын бир бөлүгү), Оштун айланма жолдору боюнча дагы иштер жүрүп жатат. Бул жолдор салынгандан кийин акы төлөнүүчү жолго кирет", - деди ал.

Эл өкүлү "акы алынуучу канча жол болот?" деген тактоо суроосун узатты.

"Учурда 5 жолду караштырып жатабыз. Бирөөсү Алматы - Чолпон-Ата жолу каралып жатат. Экинчи "Дордой" базарынын жанындагы айланма жолдун бир бөлүгү жана Сокулук-Белогорка боюнча иштер жүрүп жатат. Мындан тышкары Таласта 2 долбоорубуз бар", - деди Бариев.

Ошондой эле Транспорт министрлигинин өкүлү түндүк-түштүк альтернативдик жолу толук бүткөрүлгөндөн кийин акы алынуучу жол болушу мүмкүндүгүн кошумчалады.