Акылбек Жапаров Ош мамлекеттик университетинин студенттерине лекция окуду

Министрлер кабинетинин төрагасы Акылбек Жапаров Ош облусуна болгон иш сапарынын алкагында Ош мамлекеттик университетинин студенттери үчүн лекция окуду.

Өкмөттүн басма сөз кызматынан билдиргендей, Жапаров анда университеттердин өнүгүүсүнүн 4 модели, окутуунун кредиттик технологиялары жана академиялык эркиндик туурасында кенен токтолду. Ошондой эле ал студенттерге бизнес, бийлик жана илимдин биргелешкен аракети, илим, билим менен экономиканын байланышы туурасында айтып берди.

Мындан сырткары өкмөт башчы Ош шаарынын мектептеринин директорлору менен жыйын өткөрдү. Анда келечек муунду тарбиялоо, билим берүү жаатындагы инновациялык технологиялар туурасында кенен маалымат берди.

"Бизге келечекте окуучулар мектепти бүткөн соң төрт тилде эркин сүйлөгөн, бир өнөрдүн ээси, мекенчил жана адептүү болушу үчүн биргеликте активдүү аракеттерди көрүү зарыл", - деди Жапаров.

Ал учурда жасалма интеллект бардык тармактарда атаандаштык жаратып жатканын, келечектеги муун анын тилин жатка билиши керектигин белгиледи.