Сот Жусупбек Коргонбай уулун Бейшеналиевге моралдык чыгым төлөп берүүгө милдеттендирди

Сот министр Алымкадыр Бейшеналиевдин экс-депутат Жусупбек Коргонбай уулунун парламентте сүйлөгөн сөзү боюнча доо арызын канааттандырды. Бул тууралуу жактоочу Кайсын Абакиров социалдык тармактагы баракчасы аркылуу билдирди.

Эске салсак, 14-марттагы Жогорку Кеңештин жыйынында Жусупбек Коргонбай уулу саламаттыкты сактоо министри Алымкадыр Бейшеналиевди уюшкан кылмыштуу топтор менен байланышы бар деп сындаган.

Андан соң министр депутатты сотко берген. Бул кадамга баруусуна Коргонбай уулу анын ар-намысына жана кадыр-баркына шек келтиргени себеп болгонун билдирген.

"Ленин райондук соту саламаттыкты сактоо министри Алымкадыр Бейшеналиевдин экс-депутат Жусупбек Коргонбай уулунун 14-марттагы парламент жыйынында сүйлөгөн сөзү үчүн ар-намыс, кадыр-баркын коргоо жана моралдык чыгымды өндүрүү боюнча доо арызын канааттандырды.

Сот Жусупбек Коргонбай уулун чындыкка дал келбеген маалыматты төгүндөп, 10 миң сом өлчөмүндө моралдык чыгым төлөөгө милдеттендирди", - деп жазды жактоочу.

23-апрелде БШК Жусупбек Коргонбай уулун депутаттык мандатынан ажыраткан. Анын ыйгарым укуктары өзү жазган арыздын негизинде мөөнөтүнөн мурда токтотулган болчу.