Министрлик токко урунуп каза болгон жаран тууралуу маалымат берди

Чүйдүн Дөң-Арык айылында токко урунган жаран энергетик эмес. Бул тууралуу Энергетика министрлиги маалымдады.

Белгилей кетсек, 31-майда Чүй РЭСине жергиликтүү тургундар телекомдун жыгач мамысында адам илинип турганын айтып чалышкан.

РЭСтин ыкчам бригадасы илинип турган адамды (каза болгон) жерге түшүрүшкөн.

Ал 1966-жылы туулган Ш.К. аттуу АТСнын телефонисти болгон. Телеком кызматкери телефон линиясын тартуу үчүн мамыга чыгып токко урунган.

"Ал кызматкер эч кандай коопсуздук эрежелерин сактаган эмес жана Чүй РЭСине маалымат берген эмес.

Эгерде РЭСке маалымат берилгенде РЭС тарабынан коопсуздук үчүн электр энергиясы өчүрүлмөк", - деп билдирди министрлик.