Бишкек ЖЭБдеги жарылуу: Жабыркаган жаран кызматтык үйдө жашамай болду

Бишкек Жылуулук электр борборунда (ЖЭБ) орун алган жарылуудан жабыркаган кызматкерге ишкананын балансындагы үйдө жашаганга мүмкүнчүлүк түзүлдү. Бул тууралуу Энергетика министрлиги билдирди.

Маалыматка ылайык, жабырлануучунун абалын эске алуу менен Бишкек ЖЭБинин жетекчилиги ага ишкананын балансындагы үйдө жашоого мүмкүнчүлүк түзүп беришкен.

"Кырсык болгонго чейин жабырлануучу үй-бүлөсү менен жатаканада жашаган жана жалгыз багуучу болуп келген", - деп айтылат маалыматта.

Ошондой эле министрлик ишкана эки жабырлануучуга моралдык чыгым төлөп бергенин кошумчалады.

Эске салсак, 2-февралда түнкү саат үчтөр чамасында Бишкек Жылуулук электр борборунда авария болуп, 5 адам жабыркаган. Жабыркагандардын ичинен абалы оор деп бааланган 2 киши Түркия мамлекетинде дарыланып, 9-май күнү өлкөгө кайтып келишкен.