Тажикстандын абактарында канча кыргызстандык отурганы белгилүү болду

Бүгүн, 12-июндагы Жогорку Кеңештин жыйынында депутат Миргүл Темирбаева чет мамлекеттердин абактарында отурган кыргыз жарандары тууралуу маселе көтөрдү.

Жыйында "Кыргыз Республикасынын айрым мыйзам актыларына (Жаза аткаруу кодексине, Кылмыш-жаза кодексине) өзгөртүүлөрдү киргизүү жөнүндө" мыйзам долбоору экинчи окууда каралып жаткан.

Ал алгач коңшу Тажикстандын абактарында канча кыргыз жараны бар экенине кызыкты.

"Учурда Тажикстандын аймагында соттолгон канча Кыргызстандын жарандары бар? Аларды экстрадиция аркылуу Кыргызстанга алып келүү боюнча кандай жумуштар жүрүп жатат?" - деди Темирбаева.

Юстиция министринин орун басары Орозбек Сыдыков 25 кыргыз жараны бар экенин айтты.

Эл өкүлү Түштүк Кореяда кыргызстандык эмгек мигранттары көп экенин белгилеп, ал жактагы абалды сурады.

Сыдыков аталган өлкөнүн абактарында 8 кыргыз жараны жазасын өтөп жатканын билдирди.

Андан соң депутат айым кыргызстандык эмгек мигранттары Европа өлкөлөрүнө көп кетип жатканын айтып, батыш өлкөлөрү менен дагы экстрадиция маселесинде сүйлөшүүлөрдү алып барууну сунуштады.