Өкмөт балдардын жайкы эс алуусуна 15 миллион сом бөлөт

Жайкы мезгилде балдардын эс алуусун, ден соолугун чыңдоону жана ишке орноштурууну уюштуруунун жол-жоболорун оптималдаштыруу максатында 15 миллион сом бөлүү чечимине Министрлер кабинетинин төрагасы Акылбек Жапаров кол койду. Буга чейин бул максаттарга жыл сайын 5 миллион сом бөлүнүп келген. Бул туурасында бүгүн, 14-июнда өкмөттүн басма сөз кызматы билдирди.

Маалымдагандай, эмгек, социалдык коргоо жана миграция министрлигине, аз камсыз болгон үй-бүлөлөрдүн балдарын, майыптыгы бар балдардын, камкордукка жана көзөмөлгө алынган балдардын, багып алуучу үй-бүлөлөрдөгү балдардын, жетим балдардын жана тарбиянын өзгөчө шарттарына муктаж оорулуу балдардын, ошондой эле турмуштук оор кырдаалга туш болгон балдардын жайкы мезгилде эс алуусун уюштуруу тапшырмасы берилген.

“2023-жылы балдардын жайкы эс алуусун уюштуруу боюнча республикалык штабдын отурумунда турмуштук оор кырдаалга кабылган балдарды эң көп камтуу, ошондуктан республикалык бюджеттен каржылоонун көлөмүн көбөйтүү чечими кабыл алынган”, - деп кошумчалаган маалыматта.

Белгилей кетсек, жыл сайын балдар президенттик администрацияга караштуу «Алтын балалык» ден соолук жана реабилитациялык борбору мамлекеттик мекемесине жөнөтүлөт. Быйыл 1600гө жакын бала эс алары кабарланган.