"Канчалык кереги бар?" Масалиев аймактарда курулуп жаткан аэропорттордун ишин сындады (видео)

Бүгүн, 18-июнда Жогорку Кеңештин Транспорт, коммуникациялар, архитектура жана курулуш боюнча комитетинин жыйынында депутат Исхак Масалиев Таласка жана Жалал-Абадга курулган аэропорттордун канчалык деңгээлде өлкөгө пайдасы бар экендигине кызыкты.

“Ош-Бишкек альтернативдик жолу курулуп жатат. Таластан унаа менен келгендер 400-500 сом менен жетип жатат Бишкекке. Миллиондорду кетирип жаткан аэропорттордун канчалык деңгээлде кереги бар? Келечекте туризм багытына керекпи? Таласка бир да учак конгон жок. Силер жарнама кылганда каттуу кетип калып жатасыңар”, - деди эл өкүлү.

Жарандык авиация мамлекеттик агенттигинин директорунун милдетин аткаруучусу Данияр Бостонов аэропорттордун мамлекетке пайдасын түшүндүрүп бере алган жок, бирок "Талас" аэропортуна эски учак сатып алынып жаткандыгына токтолду.

“Учак бир жумада бир жолу каттайт деп пландап жатабыз. Учурда мурда колдонулган эски учакты сатып алуу алдындабыз, ал сентябрь же октябрь айларында келет”, - деп билдирди ал.