Акылбек Жапаров Бишкектеги жасалып жаткан жолдор менен объектилерди кыдырды

Министрлер кабинетинин төрагасы Акылбек Жапаров борбор калаадагы жолдорду жана бир катар социалдык объектилерди реконструкциялоонун жүрүшү менен таанышты. Бул тууралуу бүгүн, 22-июнда өкмөттүн басма сөз кызматынан билдирди.

Маалымдалгандай, өкмөт башчы алгач Ахунбаев көчөсүн бойлой реконструкцияланган жол тилкесинин абалы менен таанышып, ошондой эле жолдун Байтик баатыр көчөсүндөгү бөлүгүндөгү оңдоо иштеринин жүрүшүн көрүп чыкты. Жапаров оңдоп-түзөө иштерин өз убагында сапаттуу жүргүзүүнүн, ошондой эле тротуарлардын талаптагыдай абалын камсыз кылуунун жана борбордук көчөлөрдү көрктөндүрүүнүн маанилүүлүгүн белгиледи.

Мындан тышкары ал Жукеев-Пудовкин көчөсүндөгү Медеров жана Кулатов көчөлөрүнүн ортосундагы магистралдык жылуулук тармагын реконструкциялоонун жүрүшү менен таанышты. Жаңыланган түйүн Бишкек шаарынын түштүк аймагын жылуулук менен камсыздайт. Министрлер кабинетинин башчысы курулуш иштерин тездетүүнү тапшырды.

Андан соң Жапаров катуу тиричилик таштандыларын чыгаруу менен электр энергиясын өндүрүү боюнча экотехнологиялык заводдун курулушу башталган "Бишкек санитардык полигону" муниципалдык ишканасына барды.

Өкмөт башчы стадиондогу оңдоо иштери менен да таанышты. Стадиондун курулуш иштери ушул жылдын июнь айында башталып, реконструкциялоо иштерин ушул жылдын сентябрь айында бүтүрүү пландалууда. Стадиондо гибриддик футбол аянтчасы жана отургучтар алмаштырылат, 9 чуркоочу жол орнотулат, аянтчалар жана мекеменин башка инфраструктурасы оңдолот.

Мындан тышкары ал Эркиндик бульварындагы оңдоо иштери менен таанышты. Объекттерди кыдыруунун жыйынтыгы менен тиешелүү түзүмдөргө бир катар тапшырмалар берилди.