ИИМ түнкүсүн ызы-чуу салгандарга айып пул салууну сунуштоодо 

Милицияга үйдө жана коомдук жайларда тынчтыкты сактоо эрежелерин бузгандарды жоопкерчиликке тартуу боюнча ыйгарым укуктарды берүү сунушталууда. Тиешелүү мыйзам долбоорун ИИМ демилгелеп, коомдук талкууга койду.

Министрликтин түшүндүрмөсүнө караганда, бул мыйзам долбоору жарандардын ден соолугун жол берилген деңгээлден ашкан үн басымынын жана ызы-чуунун зыяндуу таасиринен коргоо максатында иштелип чыккан.

Документте түнкүсүн ызы-чуу чыгарып, оңдоп-түзөө иштерин жүргүзгөндөргө даттануу тийиштүү натыйжа бербей калгандыгы белгиленет. Анткени Санитардык-эпидемиологиялык көзөмөлдөө департаменти адамдык жана каржылык ресурстардын жетишсиздигинен, ошондой эле сегиз сааттык жумуш күнүнөн улам жарандардын арыздарына убагында жооп бере албай жатканы айтылат.

Эгер мыйзам кабыл алынса, ызы-чуунун деңгээлин өлчөгөн приборлорду сатып алууга каражат керек болот. Мындай прибордун бир даанасы өндүрүүчүсүнө жана моделине жараша 280 миңден 380 миң сомго чейин бааланат. Башкармалыктын аймактык бөлүмдөрүнө 126 өлчөөчү прибор сатып алууга бюджеттен 44 миллион 100 миң сом талап кылынат. Чыгым айып пулдан түшкөн каражаттын эсебинен жабылышы ыктымал.