Айтургандын өлүмү: Ишти Башкы прокуратура көзөмөлгө алды

Айтурган Маматкулованын өлүмү боюнча козголгон кылмыш ишиндеги тергөө Башкы прокуратуранын көзөмөлүндө экенин мекеменин басма сөз кызматы билдирди.

Белгилегендей, 25 жаштагы келиндин өлүмү боюнча кылмыш иши 12-июлда Бишкек шаарынын Октябрь РИИБи тарабынан "Өзүн-өзү өлтүрүүгө жеткирүү" беренеси менен ачылып, учурда тергелип жатат.

"Өлүмдүн так себебин аныктоо үчүн соттук-медициналык экспертиза дайындалган. Экспертизанын жыйынтыгы менен тийиштүү укуктук баа берилет", - деп айтылат маалыматта.

Эске салсак, 10-июлда Октябрь РИИБи иликтөө иштери башталганын маалымдаган болчу.

Айтургандын өлүмү коомчулукта резонанс жаратууда. Белгилүү болгондой, ал 7-июль күнү Бишкектеги №4 клиникалык тез жардам ооруканасында каза болгон. Жолдошу ал өз өмүрүнө кол салуу үчүн дары ичип алганын айтып чыккан.

Бирок келиндин жакындары буга ишенбей турганын, анын өлүмүнө күйөө баласы себеп болушу мүмкүн экенин айтып SUPER.KG порталына кайрылышкан.