Милиция Алайда баласына зомбулук көрсөткөн киши боюнча маалымат берди

Ош облустук милициясы социалдык тармакта тараган кичинекей баласына зомбулук көрсөтүп жаткан кишинин видеосу боюнча маалымат берди.

Ага ылайык, аталган видео соцтармактарда кечээ, 12-сентябрда тараган. Окуя Оштун Алай районунда катталганы аныкталып, тергөөгө чейинки текшерүү иштери башталган болчу.

Анын жүрүшүндө видеого тарткан жаран Алай районунун 1985-жылы туулган И.Т. аттуу тургуну экендиги аныкталып, кармалган.

Алгачкы маалыматтар боюнча И.Т. мындай аракеттерге баруусуна жубайы менен пикир келишпестиктер себеп болгон. Аны коркутуп коюу максатында өзүнүн баласын урушуп, видеого тартып, Орусияда эмгектенип жүргөн аялына жөнөткөн.

"Бала дарыгерлерге көрсөтүлүп, денесинде эч кандай жараат байкалган эмес. Учурда тийиштүү экспертизалар дайындалды" э, - дешти милициядан.

Учурда окуяга катыштыгы бар жарандар суралып, текшерүү уланууда. Анын жыйынтыгы менен мыйзамдуу чечим кабыл алынат.