Абактагы журналист Айке Бейшекеевага эл аралык сыйлык берилди

Тергөө абагында отурган журналист Айке Бейшекеева эл аралык Cena Gratias Tibi сыйлыгынын лауреаты болду. Бул тууралуу иликтөөчү журналист Болот Темиров социалдык тармактагы баракчасына жазды.

Билдирүүгө ылайык, сыйлык тапшыруу аземи Чехиянын Прага шаарында өткөн. Ага сыйлык адам укуктарын жана эркиндигин коргоо жаатындагы каармандыгы үчүн ыйгарылган.

Эске салсак, ушул жылдын 16-январында "Темиров Live" редакциясынын мурдагы жана азыркы 11 кызматкеринин үйүндө тинтүү жүргүзүлүп, өздөрү кармалган. Алардын арасында Бейшекеева да бар болчу. ИИМ аларга массалык башаламандыктарга чакырык жасагандыгы үчүн кылмыш иши козголгонун билдирген.

Кийинчерээк алардын жетөөсү ар кандай жагдайда үй камагына чыгарылган жана эч жакка кетпөө тууралуу тилкаты менен бошотулган. Учурда тергөө абагында төрт журналист – Махабат Тажибек кызы, Актилек Капаров, Азамат Ишенбеков, Айке Бейшекеева отурат.

11 журналисттин иши Бишкектин Ленин райондук сотунда каралып жатат. 3-октябрда аларга карата чечим чыгышы күтүлүүдө.