Чаткалда дайынсыз болуп жаткан алты адамдын биринин сөөгү табылды

Бүгүн, 18-октябрда Ак-Сайда дайынсыз болуп жаткан 6 адамдын бирөөсүнүн сөөгү табылды. Бул тууралуу Өзгөчө кырдаалдар министрлиги кабарлады.

Маалыматка ылайык, издөө иштеринин натыйжасында саат 12:45ке карата, көчкү түшкөн аймактан 1978-жылы туулган К.К. аттуу жарандын сөөгү табылып, тик учак менен Кумбел тилкесине алынып келинди.

Учурда издөө иштери улантылууда.

Белгилей кетсек, 9-октябрь күнү Каныш-Кыя айылынын тургундары жана бир чет элдик жаран, жалпы 14 адам, эндик өсүмдүгүнүн тамырын издөөгө тоого кеткенден кийин дайынсыз болуп жатышкан.

16-октябрда издөө иштеринин натыйжасында 8 жаран аман-эсен табылган, ал эми калган 6 кишинин кар көчкү алдында калышы мүмкүн деген маалымат берилген.

Издөө иштерине Өзгөчө кырдаалдар министрлигинин жалпы 20 куткаруучусу тартылган. Ошондой эле бүгүн, 18-октябрда саат 07:30да дайынсыз болуп жаткан алты адамды издөө үчүн тик учак жөнөтүлгөн.