Жогорку Кеңеште Аялдардын эл аралык күнүнө карата салтанат өткөрүлдү

Бүгүн, 6-мартта Жогорку Кеңеште 8-март – Аялдардын эл аралык күнүнө арналган иш-чара өтүп, ар кыл тармакта ийгиликтүү эмгектенген айымдар катышты.

Жогорку Кеңештин басма сөз кызматынан билдиришкендей, куттуктоолордо энелердин мээрими, айымдардын коомдогу ролу жана алардын лидерлик сапаттарын өнүктүрүүгө басым жасалды. Айрым депутаттар социалдык маселелерге – зомбулукка каршы аракеттер, ишкер аялдарды колдоо, азык-түлүк коопсуздугу жана айлана-чөйрөнү коргоого көңүл буруларын белгилешти.

Мурдагы депутаттар, маданият жана коомдук уюмдардын өкүлдөрү аялдардын мамлекеттик башкаруудагы ролу тууралуу баяндама жасашты.

Иш-чаранын соңунда Жогорку Кеңештин төрагасынын куттуктоосу камтылган видеоролик көрсөтүлүп, катышуучуларга ыраазычылык каттар, эстелик белектер жана гүлдөр тапшырылганы кабарланат.