Өзбекстандын Гидрометеорологиясы уулуу жаан тууралуу маалыматты четке какты

Иран аймагындагы жардыруулардан улам Борбордук Азия өлкөлөрүндө уулуу жаан жаашы мүмкүн деген маалымат чындыкка дал келбейт. Бул тууралуу Өзбекстандын Гидрометеорология кызматы билдиргенин чет элдик басылмалар жазышууда.

Эскерте кетсек, бул божомолдор 7-мартта Тегеран шаарына жакын жайгашкан Шахран мунай сактоочу жайына жасалган Израилдин чабуулунан кийин тарай баштаган. Өрттөн улам асманды кара түтүн каптап, күйгөн мунайдын калдыктарынан улам шаарда кара түстөгү жаан жааганы айтылган.

Кызмат түшүндүргөндөй, кислоттук жаан атмосферада күкүрттүн оксиддери (SO₂) жана азоттун оксиддери (NO₂) топтолгондо пайда болот. Бул заттар булуттарда суу буусу менен химиялык реакцияга кирип, көбүнчө ири өнөр жай аймактарына жакын жерлерде түзүлөт.

Адистердин айтымында, аба массалары узак аралыкка жылганда зыяндуу заттардын концентрациясы абадагы аралашуу жана чөкмө процесстердин натыйжасында азаят. Андыктан миңдеген чакырым алыстыкта уулуу жаандын пайда болушу дээрлик мүмкүн эмес.

Белгилей кетсек, маселени Жогорку Кеңештин депутаты да көтөрүп, бул жааттагы Кыргызгидрометтин мониторингине кызыккан.