Австралия гимнди ырдоодон баш тарткан ирандык футболчу аялдарга башпаанек берди 

Австралия бийлиги футбол боюнча Ирандын аялдар курама командасынын беш оюнчусуна башпаанек берилгенин билдирди. Бул тууралуу ВВС news басылмасы жазды.

Андагы маалымат боюнча, футболчулар Австралияда өтүп жаткан Азия кубогунун алгачкы оюнунда Ирандын улуттук гимнин аткарбай коюшкан. Мындан улам алар мекенине кайтып барса, коопсуздугуна коркунуч жаралышы мүмкүн экени айтылган.

Ал эми австралиялык маалымат каражаттары дүйшөмбү күнү эртең менен 5 футболчу мейманканадан чыгып, полициядан жардам сурап кайрылганын жана учурда коопсуз жерде экенин билдиришти.

Аталган окуядан кийин АКШ президенти Дональд Трамп Австралия бийлигине Ирандын бүтүндөй командасына башпаанек берүүнү сунуштаган. Андан кийин Трамп өзүнүн Truth Social социалдык тармагындагы баракчасына "5 оюнчуга жардам көрсөтүлдү" деген билдирүү калтырган.

Бирок футболчулар кийинки оюндарда гимнди ырдап, патриоттук кыймылдарды көрсөтүшкөн. Айрым байкоочулар муну оюнчуларга же алардын үй-бүлөлөрүнө кысым же коркутуулар болгонунун белгиси деп божомолдошкон.