Бишкекте “Жаштар экстремизмге каршы” форуму өттү

Бүгүн, 10-мартта “Сейтек” балдар жана жаштар улуттук борборунда “Жаштар экстремизмге каршы” аттуу форум өткөрүлдү. Бул тууралуу мэриядан билдиришти.

Маалыматка ылайык, иш-чаранын максаты — жаштар арасында экстремизмдин алдын алуу жана күчтүү жарандык позицияны калыптандыруу.

Форумга Бишкек шаарынын мэринин орун басары Виктория Мозгачева, мамлекеттик органдардын, укук коргоо түзүмдөрүнүн, дин өкүлдөрүнүн, Жогорку Кеңештин депутаттарынын, коомдук ишмерлердин жана борбор калаадагы мектептердин окуучулары катышты.

Мэрдин орун басары өз сөзүндө экстремизмдин алдын алуу үчүн мамлекеттик органдардын, билим берүү мекемелеринин жана коомчулуктун биргелешип иштөөсүнүн маанилүүлүгүн белгиледи. Ал коопсуз жана туруктуу социалдык чөйрөнү түзүүдө тарбиянын, билим берүүнүн жана патриоттук баалуулуктардын ролу чоң экенин баса айтты.

Форумдун алкагында укук коргоо органдарынын өкүлдөрү, дин ишмерлери жана депутаттар баяндама жасашты. Мындан сырткары, экстремизмге каршы тематикалык видеороликтер көрсөтүлүп, окуучулар тарабынан театрлаштырылган спектакль жана чыгармачылык номерлер тартууланды.

Мындай иш-чаралар жаштардын укуктук сабаттуулугун жогорулатууга, толеранттуулукту калыптандырууга жана улуттар аралык ынтымакты бекемдөөгө өбөлгө түзөт.