Астанада Чыңгыз Айтматовдун 100 жылдыгын утурлай Кыргыз мюзиклдери көрсөтүлүүдө

Казакстандын борбору Астана шаарында Токтогул Сатылганов атындагы Кыргыз улуттук филармониясы “Раймалы менен Бегимай” этно-мюзиклин жана “Жамийла” мюзиклин казак коомчулугуна жана мекендештерге тартуулоодо. Бул тууралуу Маданият министрлиги билдирди.

Маалым болгондой, маданий иш-чаралар улуу жазуучу Чыңгыз Айтматовдун 100 жылдыгына арналып, президенттин жарлыгынын алкагында өтүүдө.

Кечээ, 17-мартта Астанадагы Калибек Куанышбаев атындагы Казак улуттук музыкалык драма театрында “Раймалы менен Бегимай” этно-мюзикли көрсөтүлдү.

Иш-чарага мамлекеттик катчы Арслан Койчиев баштаган бир катар Кыргызстандын мамлекеттик жетекчилери, Казакстандын бир катар министрлери, залкар жазуучу Айтматовдун уулу Элдар Айтматов, элчиликтин өкүлдөрү катышты.