Кыргызстанда сот арачылары институтун киргизүү сунушталды

Жогорку Кеңештин жыйынында төраганын биринчи орун басары Медербек Алиев өлкөдөгү сот системасынын абалына токтолуп, сот адилеттигин жакшыртуу боюнча бир катар сунуштарды айтты. Бул тууралуу Жогорку Кеңештин басма сөз кызматынан билдиришти.

Анын белгилешинче, учурда коомчулук тарабынан сот тутумуна карата нааразычылык жана сын-пикирлер көп болуп жатат. Бул көрүнүштүн себептери катары сот иштеринин негизсиз создуктурулушу, коррупция жана тууганчылдык сыяктуу көйгөйлөр аталды.

Ушуга байланыштуу Медербек Алиев Конституцияда каралган, бирок азырынча ишке кирбей турган сот арачылары институтун киргизүүнү сунуштады. Анын айтымында, бул механизм сот реформасынын маанилүү багыттарынын бири болуп саналат.

Эл өкүлү сот арачылары институту бир катар өнүккөн өлкөлөрдө, ошондой эле Орусия жана Казакстанда ийгиликтүү колдонулуп жатканын белгиледи. Ал бул система сот адилеттигинин атаандаштык принцибин камсыз кылууга өбөлгө түзөрүн айтты.

Мындан тышкары Медербек Алиев соттордун көбү мурда укук коргоо органдарында иштегендиктен, айыптоочу өкүмдөрдү чыгарууга көбүрөөк ыктап жатканын белгиледи. Анын пикиринде, сот арачылары институту коррупцияны азайтууга жана сот процесстерине жарандардын катышуусун кеңейтүүгө жардам берет.

Жыйынтыгында сунушталган демилге сот системасын реформалоодо жана коомчулуктун ишенимин жогорулатууда маанилүү кадам катары бааланууда.