Жапаров: "Министрликтердин жетекчилери аймактарга үзгүлтүксүз чыгышат"

Президент Садыр Жапаров жакын арада министрликтердин жана мамлекеттик органдардын жетекчилеринин аймактарга чыгуу графиги бекитилерин билдирди. Бул тууралуу ал Алай районунда жергиликтүү тургундар жана актив менен жолугушуу учурунда айтты.

Мамлекет башчысынын айтымында, иш сапарынын жүрүшүндө көтөрүлгөн маселелердин басымдуу бөлүгү жергиликтүү бийлик органдарынын жана тиешелүү мамлекеттик түзүмдөрдүн компетенциясына кирет. Ошондуктан аларды борбордук деңгээлде эмес, аймактарда чечүү зарыл.

Садыр Жапаров бул маселени чечүү үчүн министрликтердин жана мамлекеттик органдардын жетекчилери аймактарга үзгүлтүксүз чыгып туруусун камсыздаган атайын график иштелип чыгарын белгиледи. Ага ылайык, жетекчилер жер-жерлерге барып, жарандардын кайрылууларын түз кабыл алып, маселелерди ыкчам чечүүгө аракет кылышат.

Жолугушуунун жүрүшүндө жергиликтүү тургундар да бул демилгени колдошту. Алардын айтымында, жетекчилердин аймактарга бат-баттан барып турушу көптөгөн көйгөйлөрдү жеринде чечүүгө мүмкүнчүлүк берет жана борборго кайрылуунун зарылдыгын азайтат.

Мындан тышкары, мындай практика мамлекеттик органдардын жоопкерчилигин жогорулатып, эл менен бийликтин ортосундагы байланыштарды бекемдейт деп күтүлүүдө.