Садыр Жапаров Эдил Байсаловго дипломатиялык ранг ыйгарды

Бүгүн, 27-апрелде президент Садыр Жапаров Кыргызстандын Америка Кошмо Штаттарындагы жаңы дайындалган элчиси Эдил Байсаловду кабыл алды. Бул тууралуу өлкө башчысынын басма сөз кызматы билдирди.

Маалым болгондой, жолугушуунун жүрүшүндө Эдил Байсалов мамлекет башчысына өткөн аптада өткөрүлгөн кыргыз-америкалык саясий консультациялардын жыйынтыктары, ошондой эле министрлер кабинетинин төрагасы Адылбек Касымалиевдин АКШнын мамлекеттик катчысы Марко Рубио менен сүйлөшүүлөрүнүн жыйынтыктары тууралуу маалымат берди.

Садыр Жапаров кыргыз-америкалык кызматташтыкты мындан ары өнүктүрүүнүн маанилүүлүгүнө токтолуп, эки тараптуу күн тартибинин негизги артыкчылыктарын, анын ичинде соода-экономикалык, инвестициялык жана социалдык-гуманитардык өз ара аракеттенүүнү илгерилетүүнү белгиледи.

Мамлекет башчысы элчиге өлкөнүн улуттук кызыкчылыктарын алдыга жылдыруу, ошондой эле АКШ менен өз ара пайдалуу өнөктөштүктү бекемдөө боюнча ишти активдештирүүнү тапшырды.

Ошондой эле Садыр Жапаров Байсаловго президенттин эл аралык демилгелер боюнча атайын өкүлүнүн кошумча функцияларын жүктөп, ага элчи жогорку дипломатиялык рангын ыйгарды.