Кыргыз-Казак чек арасында унаалардын узун кезеги жаралды 

Социалдык тармактарда Кыргыз-Казак чек арасында узун кезек жаралганы тууралуу маалымат тарады. Ал эми Кыргызстандын Мамлекеттик чек ара кызматы өткөрүү пункттары кадимки тартипте иштеп жатканын билдирди.

Чек ара кызматынын маалыматына ылайык, учурда сезондук мезгилге байланыштуу жүк ташуу агымынын күчөгөндүгүнөн улам Кыргызстандан чыгуу багытындагы "Ак-Тилек-автожол" көзөмөл-өткөрүү пунктунун алдында жүк ташуучу унаалардын топтолушу байкалган.

"25-майга карата "Ак-Тилек-автожол" пунктунун алдында чек ара көзөмөлүнөн өтүү үчүн 150гө жакын жүк ташуучу унаа кезекте турат. Ал эми Казакстандан Кыргызстанга кирүү багытында унаалардын топтолушу катталган жок. Кыргыз тараптан текшерүү процедуралары ыкчам тартипте жүргүзүлүүдө",- деп билдирди Чек ара кызматы.