Допингчилердин Олимпиадасы: Жыйынтыгы шылдыңга тете болду

Катышуучуларга допинг колдонууга уруксат берилген биринчи Enhanced Games мелдеши АКШнын Лас-Вегас шаарында болуп өттү.

Турнирге катышкан 42 спортчунун көпчүлүгү көрсөткүчтөрдү жогорулатуучу дарыларды (допинг) колдонушкан. Бул мелдеште бир топ дүйнөлүк рекорддор жаңыртылат деп божомолдонгон.

Акырында бир гана рекорд жаңыртылган. 2024-жылдагы Европа чемпиону, грек суучулу Кристиан Голомеев 50 метрлик эркин стилде сүзүүнү 20,81 секундда сүзүп, март айында австралиялык спортчу койгон 20,88 секунддук көрсөткүчтөн ашып түшкөн. Бирок ал расмий мелдештерде колдонууга тыюу салынган костюм кийип сүзгөн. Голомеевдин убактысы расмий спорт уюмдары тарабынан таанылбайт.

Голомеев жеңишке жеткени үчүн 250 миң доллар жана расмий эмес дүйнөлүк рекорд койгону үчүн 1 миллион доллар бонус алат.

Ал эми Усейн Болттун рекордун "жаңыртам" деп убада берген Фред Керли Олимпиада финалындагы акыркы орундун көрсөткүчүн көрсөткөн.

Эң кызыгы турнирдеги бир нече мелдештерде допинг колдонбогон спортчулар жеңишке жетишишкен. Шоудон кийин башкы демөөрчүнүн акциялары 41 пайызга кескин төмөндөгөн.