ИИМ чет элдик жумушчулар өлкөгө мыйзам чегинде тартылып жатканын билдирди

ИИМ социалдык тармактарда чагымчыл аракеттер болуп жатканын маалымдап, коомчулукка билдирүү жасады.

Мекеменин басма сөз кызматы билдиргендей, интернеттин кыргыз сегментинде улут аралык кастык, жек көрүүнү күчөтө турган чагымчыл билдирүүлөр орун алууда. Анын ичинде чет өлкөлүк жумушчуларга карата жазылгандар болуп жатканы белгиленди.

"Буга чейин президентибиз айткандай, мамлекетибизде ири эл аралык инфратүзүмдүк долбоорлор, масштабдуу объекттер ишке ашырылууда. “Кытай-Кыргызстан-Өзбекстан” темир жолу, Асман шаары, ири энергетикалык “Камбар-Ата-1”, жана башка экологиялык объекттер курулууда. Анан аларга сөзсүз адистер, жумушчу күчү керек болот. Алар ээн-эркин, каалагандай эле кирип-чыгып жаткан жери жок. Ар бири тийиштүү уруксат документтери, визасы менен келип, биздин көзөмөлдө турат. Долбоорлор бүткөндө кайра эле кетишет. Эч кимиси калып калбайт. Айрым долбоорлор 2030-жылы бүтсө, айрымдары 2035-жылдары бүтөт",- деп билдирди ИИМ.

Министрлик чагымчыл аракеттердин жоопкерчилиги караларын эскертти.