Садыр Жапаров Астанада ЖЕЭКтин тар курамдагы жыйынына катышууда

Бүгүн, 29-майда президент Садыр Жапаров Астана шаарында Жогорку Евразия экономикалык кеңешинин (ЖЕЭК) кезектеги жыйынына катышууда.

Өлкө башчысынын басма сөз кызматы билдиргендей, жыйындын алдында Көз карандысыздык сарайында Евразия экономикалык биримдигине мүчө мамлекеттердин башчыларын тосуп алуу аземи болуп өттү.

Казакстандын президенти Касым-Жомарт Токаев Кыргыздын президенти Садыр Жапаровду, Орусиянын президенти Владимир Путинди, Беларустун башчысы Александр Лукашенкону, Армениянын вице-премьери Мгер Григорянды, ошондой эле Евразия экономикалык комиссиясынын коллегиясынын төрагасы Бакытжан Сагинтаевди тосуп алды.

Катышуучулар биргеликте сүрөткө түшкөндөн кийин, тар курамдагы жыйын өткөрүү үчүн залга өтүштү.