Кыргызстанда органикалык айыл чарбасын өнүктүрүү маселелери талкууланды

Бүгүн, 2-июнда органикалык айыл чарбасын өнүктүрүү жана климаттын өзгөрүүсүнө ыңгайлашуу маселелерине арналган жумушчу топтун кезектеги жыйыны өттү. Жыйынга мамлекеттик органдардын өкүлдөрү жана тармактын адистери катышты.

Жогорку Кеңештин басма сөз кызматынан билдиришкендей, талкуунун жүрүшүндө органикалык продукцияны тастыктоо системасындагы тоскоолдуктар, айрыкча аккредитациялоо процессинде жаралып жаткан көйгөйлөр көтөрүлүп, аларды чечүү жолдору сунушталды. Ошондой эле айыл чарба лабораторияларынын учурдагы абалына мониторинг жүргүзүү жана заманбап талаптарга жооп берген лабораторияларды түзүү маселеси каралды.

Мындан сырткары дыйкандарды кооперативдерге бириктирүү, органикалык аймактарды өнүктүргөн чарбаларды каржылык жактан колдоо жана күрөөсүз насыя берүү мүмкүнчүлүктөрү талкууланды.

Жыйындын жыйынтыгында органикалык айыл чарбасын өнүктүрүүгө тоскоол болуп жаткан мыйзамдык жана институционалдык маселелерди чечүү боюнча иштерди күчөтүү тапшырмасы берилди.