Ысык-Көлдө жаан кесепети: Унаа жолу убактылуу жабылды

Ысык-Көл облусунда нөшөрлөп жааган жаандын кесепетинен сел жүрүп, Балыкчы — Ананьево — Каракол унаа жолунун болжол менен 100-чакырымын каптап, жол эки тараптуу жабылды. Бул тууралуу ӨКМдин билдиришти.

Алдын ала маалымат боюнча, окуя 5-июнь күнү саат 20:00 чамасында катталган. Селден улам жолдо 2-3 унаа токтоп калган.

Учурда жеринде Өзгөчө кырдаалдар министрлигинин ыкчам тобу иш алып барууда. Тазалоо иштерине ӨКМдин Ысык-Көл облусу боюнча башкармалыгынын өкүлдөрү, 47 куткаруучу жана жарандык коргонуу кызматтарынын 20 кызматкери тартылган.

Жолду тазалоого жалпы 9 атайын техника, анын ичинде экскаваторлор, жүктөгүчтөр, грейдерлер жана самосвалдар ишке киргизилип, жолду ачуу аракеттери жүрүүдө.

ӨКМ абалга көзөмөл жүргүзүп, кошумча маалымат берилерин билдирди.