Иран куткаруучулары толук даярдык режимине өткөрүлдү

АКШ тарабынан жаңы соккулар жасалышы мүмкүн деген коркунучтан улам Ирандын куткаруу кызматтары толук даярдык абалына өткөрүлдү. Бул тууралуу Ирандын Кызыл Жарым Ай коому жазып чыкты.

Маалыматка ылайык, өлкө боюнча куткаруучу топтор аба соккуларынын кайрадан уланышы мүмкүн деген жагдайга байланыштуу өзгөчө даярдыкта турушат.

Буга чейин АКШнын президенти Дональд Трамп америкалык күчтөр Ирандын Харг аралын көзөмөлгө ала аларын айтып, жумага караган түнү Иранга карата «абдан күчтүү соккулар» жасаларын билдирген. Ошол эле учурда Вашингтон менен Тегерандын ортосундагы сүйлөшүүлөр уланууда.

Эске салсак, АКШ жана Израил быйыл 28-февралдан тарта Ирандагы бир катар объектилерге сокку урган. Апрель айында тараптар ок атышууну токтотуу боюнча макулдашканын жарыялаганы менен, айрым учурларда өз ара чабуулдар дагы эле катталууда.

Учурда Иран менен АКШ сүйлөшүүлөр аркылуу өз ара түшүнүшүү боюнча алкактык меморандумду макулдашууга аракет кылып жатышат. Бирок аймактагы чыңалуу толук басаңдай элек.