Ооган бийлиги аялдардын нааразычылык акцияларын күч менен басты

Ооганстандын Герат шаарында аялдар үчүн катуу чектөөлөрдүн киргизилишинен улам башталган башаламандык басаңдады. Бул тууралуу чет элдик басылмалар жазышты.

Маалыматтарга караганда, бир нече күндөн бери аялдарга коюлган жаңы чектөөлөргө каршы нааразычылык акциялары жүрүп жаткан Герат шаарына кошумча коопсуздук күчтөрүн жана аскердик техника жайгаштырылган.

Көчөлөрдө кошумча текшерүү пункттары орнотулуп, полиция жана чалгындоо агенттери кыдырып, жарандардын телефондорун текшерип жатышат.

Жергиликтүү тургундар коопсуздук күчтөрү тарабынан курал колдонулганын билдиришсе, бийлик өкүлдөрү муну четке кагышкан. Укук коргоо органдары тарабынан толук көзөмөл жүргүзүлгөндүктөн, жарандар андан аркы демонстрацияларды токтотууга аргасыз болушкан.