Курманбек Дыйканбаев: “Президентти колдоп кол койгом”

Сот өкүмү чыккандан кийин Курманбек Дыйканбаев айыптоого байланыштуу оюн айтып, эмне үчүн документке кол койгонун түшүндүрдү.

“Мамлекетке кызмат кыла беребиз. Коюлган берене дагы бир ирет каралат болушу керек, ага убакыт керек. 75 адамдын ичинен өзүмдү айтсам, мени чакырышканынан барып кол койгом, андан кийин кетип калгам. Мени менен чогуу барган адам азыр үйүндө, мен болсо беш ай камакта болдум. Юрист эмесмин, президент Садыр Жапаровду колдоп эле кол коюп бергем”, - деди Курманбек Дыйканбаев сот отурумунан кийин журналисттердин суроолоруна жооп берип жатып.

Эске салсак, “Бийликти күч менен басып алуу” беренеси боюнча Бекболот Талгарбеков, Эмилбек Узакбаев, Курманбек Дыйканбаев, Аалы Карашев жана Курсан Асанов күнөөлүү деп табылып, ар бири 4 жылга эркинен ажыратылган. Ошол эле учурда сот алардын жазасын 3 жылдык пробациялык көзөмөл менен алмаштырды.