Ноокенде мас айдоочу 71 жаштагы кишини өлтүрө сүздү

Жалал-Абаддын Ноокен районундагы Бишкек–Ош унаа жолунун Кызыл-Туу айыл аймагында жол кырсыгы катталды. Бул тууралуу Жол кыймылынын коопсуздугун камсыздоо башкы башкармалыгы билдирди.

Окуя 1-июлда болгон. Daewoo Matiz үлгүсүндөгү унаанын айдоочусу жолдун четинде велосипед менен бара жаткан 71 жаштагы жаранды сүзүп, окуя болгон жерден качып кеткен. Жаран окуя болгон жерде каза болгон.

Издөө иштеринин натыйжасында айдоочу кармалып, текшерүүдө ал мурда соттун чечими менен 1 жылга айдоочулук укугунан ажыратылганы такталды. Ошондой эле айдоочу жол кырсыгы болгон учурда мас абалда болгону аныкталган. Факт боюнча кылмыш иши козголуп, шектүү 2 айга камакка алынды.