Бишкек соту Имамидин Ташовдун иши боюнча өкүм чыгарды

Бишкек шаардык соту "KG Group" курулуш компаниясынын негиздөөчүсү Имамидин Ташовдун иши боюнча өкүм чыгарды.

Шаардык соттун басма сөз кызматы билдиргендей, сот аны Кылмыш-жаза кодексинин "Мамлекеттик чек арадан мыйзамсыз өтүү" беренеси боюнча актады. Ал эми Кылмыш-жаза кодексинин "Массалык баш аламандыктарга чакырык" жана "Бийликти күч менен басып алуу" беренелери боюнча күнөөлүү деп тапты.

Натыйжада Бишкектин Биринчи Май райондук соту чыгарган өкүм өзгөртүлүп, 9 жылдык жаза 8 жылга кыскартылган.

Эске салсак, былтыр июль айында Бишкектин Биринчи Май райондук соту Имамидин Ташовду 9 жылга абакка кескен.

Имамидин Ташов 2024-жылдын 22-апрелинде Чүй облусунун Кайыңды айылынан УКМК тарабынан кармалган.

Ошол жыллдын 9-январында социалдык тармактарга Ташовдун кайрылуусу жарыяланган. Анда ишкер 2023-жылдын 27-декабрында УКМКнын кызматкерлери эркине каршы уурдап кетип, 8 күн белгисиз жайда кармап отурганын айткан. Ошол кездеги УКМКнын башчысы Камчыбек Ташиев муну четке каккан.